Consolacion, Danao pabiling walay pilde sa Gov's Cup
CEBU, Philippines – Ang defending North division champion Consolacion Sarok Weavers ug Danao City nagpabiling wa'y pilde sa 2nd Cebu Governor's Cup 2018 Inter-Cities and Municipalities Under-21 Developmental Basketball Tournament.
Ang Consolacion mirehistro sa ikaupat nilang sagunson nga daog human gilabhan ang Compostela, 104-83, samtang ang Danao wa'y hago nga mikulit sa ikatulo nilang daog human ma-forfeit ang Carmen.
Wala sab magpa-alkansi ang Mandaue nga mipahayag sa ilang tsansa nga moabante sa quarterfinals ubos sa North Bracket 1 human ilang gilubong ang Compostela, 86-62.
Bitbit ang 2-1 record, gikinahanglan pa hinuon nga pildihon sa Mandaue ang Danao ug Consolacion sa katapusan nilang duha ka duwa aron segurado silang makaangkon og luna sa sunod nga hugna sa torneyo.
Sa North Bracket 2, ang San Francisco nimasaker sa Tudela, 110-50, ang Borbon nakaeskapo batok sa Sogod, 95-92.
Ang San Francisco ug Borbon nagsawo karon sa liderato sa ilang grupo bitbit ang 2-0 nga baraha.
- Latest