30 sports event ilalatag ng Pinas sa 2019 SEAG
MANILA, Philippines — Hangga’t maaari ay gusto ng Philippine Olympic Committee na isakto sa 30 ang bilang ng mga sports events na ilalatag para sa 2019 Southeast Asian Games na pamamahalaan ng bansa.
Ito ang sinabi kahapon nina POC president Ricky Vargas at chairman Rep. Bambol Tolentino sa isang press conference sa Shangri-La BGC sa Taguig City.
“Initial 30 ‘yong approved events because of the 30th edition of the Southeast Asian Games and because of President Rodrigo Duter30,” ani Tolentino.
Ang mga inisyal na inaprubahan ng SEA Games Federation ay ang athletics, aquatics, archery, badminton, baseball/softball, basketball, billiard sports, bowling, boxing, cycling, equestrian/polo, fencing, football, golf, gymnastics, judo/jiu-jitsu, karatedo, sailing, sepak takraw, shooting, squash, taekwondo, triathlon, volleyball, weightlifting, wrestling/kurash, wushu, arnis, dancesports at muay.
Hindi pa ito ang pinal na listahan para sa 2019 SEA Games na nakatakda sa Nobyembre 30 hanggang Disyembre 10 at idaraos sa New Clark City, Subic at Metro Manila.
“We also gave the deadline of June 13 for them to submit any additional sports that they would like us to consider and we will take a look at it,” wika ni Vargas, ang co-chairman ng Philippine Southeast Asian Games Organizing Committee.
Idinagdag ng POC chief na tatalakayin ng SEAG Federation ang mga ikukunsiderang sports events sa pulong nila sa Nobyembre.
Samantala, sinabi ni Philsog executive director Ramon ‘Tats’ Suzara na ihahayag nila ang SEA Games mascot, logo at slogan sa Hulyo para sa isang major launch sa Clark, Visayas at Mindanao.
- Latest
