Makasaysayanong Marathon ug lumba sa baroto sa hinunangan

CEBU, Philippines – Ang lungsod sa Hinunangan,  Southern Leyte magselebrar sa ika-165 niining founding anniversary karong Hunyo 24 uban ang duha ka makasaysayanong kalihukan sa paugnat sa kusog - ang 1st Hinunangan Bay Marathon ug 'Balik Baroto Regatta', usa ka maanindot ug makalingaw nga lumba sa baroto nga pagasalmotan sa mga mananagat sa nagkadaiyang dapit sa Kabisay-an ug Mindanao.

Ang kaluhang kalihukan nga gimugna ni kanhi Customs district collector  David 'Kuya Boy' Odilao  Jr.  gilusad gahapon nilang Kongresista Roger Mercado ug Hinunangan Mayor Reynaldo Fernandez. Giubanan sila ni Philippine Sports Commissioner Ramon 'El Presidente' Fernandez ug Hilongos Mayor Jay Roble.

"We are having these two big events primarily because we want to promote the beauty of Southern Leyte. We have so much to offer in our province," matud pa ni Mercado, ang representante sa bugtong distrito sa Southern Leyte atol sa press conference kagahapon sa Cafe Laguna-Ayala.

"This marks for the first time that we are having this kind of activity in our municipality and without doubt it's going to be the biggest celebration of our founding anniversary," sumala pa ni Mayor Fernandez.

Alang ni Odilao, ang pagdala sa maong duha ka dakong events sa yuta niyang natawhan usa ka damgo nga nahatagan og katumanan.

"I've been dreaming about this for several years now, and I can't contain my happiness that finally it has come into fruition," matud pa ni Odilao, usa ka tinamod nga event organizer nga giyukboan isip amahan sa Sinulog ug Bahug-Bahug sa Mactan.

Sa marathon, dul-an sa P300,000 nga ganti ang iapud-apud sa mga mananaog.

Gawas sa tropeyo, ang makampiyon sa men's 42km race mobulsa og P30,000, samtang ang women's top finisher makadawat og P20,000.

Ang makampiyon sa 21km dunay P10,000 matag usa, samtang ang manghawod sa 9km gantihan og P8,000.

Ang rehistrasyon nagkantidad og P500 sa 9km, P1,000 sa 21km  ug P1,500 sa full marathon.

Niadtong mga interesado, mahimong magparehistro sa Hinunangan Mayor's Office, Southern Leyte Provincial Capitol ug sa Philippine Sports Commission (PSC)-7 office diha sa Cebu City Sports Center. 

Alang sa dugang mga detalye, mahimong mokontak ni Kuya Boy Odilao (0915-1429580/0922-3942349) o ni race director Joe Deresas (0933-5484858).