Rockets kinahanglan mag-inutok aron makabawos sa Warriors
CEBU, Philippines – Ang Houston Rockets kinahanglan nga mag-inutok og duwa kun gusto nilang mobawos sa defending champion Golden State Warriors.
Mao kini ang gustong mahitabo ni Rockets coach Mike D'Antoni sa ilang pakigharong batok sa Warriors sa Game-2 sa ilang 'best-of-seven' NBA Western Conference finals nga gikatakda karong alas-9 sa buntag didto gihapon sa Toyota Center sa Houston, Texas.
Topseed man tuod, apan ang Rockets mao na karon ang dehado human sila gibihag sa Warriors, 119-106 sa unang duwa sa ilang serye niadtong Martes.
Si James Harden mipabuhagay og 41 puntos, apan nahagba gihapon ang Rockets. Kini bisan pa man og ilang nalimitahan ang alas sa Warriors nga si Stephen Curry ngadto lamang sa 18 puntos.
Timaan kini kun unsa kabagsik ang Warriors. Bisan tuod og wala mosalida si Curry, wala kini nahimong babag sa Golden State ilabi na kay mikayod og maayo silang Kevin Durant ug Klay Thompson.
Gawas nga napuno sa talento, halapad sab og kasinatian sa kampiyonato ang Warriors.
Sa tinguha nilang makabawos, si D'Antoni nagkanayon nga kinahanglan nga andam sila sa mental nga aspeto, ingon man usa ka minarunong nga duwa ang ilang ipakita batok sa Warriors.
Masaligon hinuon si D'Antoni sa ilang tsansa nga makatabla, apan gikinahanglan nila nga mohimo og init nga opensiba aron mapiog ang usa ka dekalibreng puwersa.
- Latest
