CRV may paglaum pa nga maapil sa Magic Four sa FYA Summer League 2018
CEBU, Philippines – May paglaum pa ang CRV nga moapil sa Magic Four human nila marimati ang Angel Mary Pawnshop, 93-79 sa FYA Season 21 Summer League 2018 basketball tournament niadtong Domingo didto sa Vicente Sotto gym sa Punta Princesa, dakbayan sa Sugbo.
Sa laing bahin, ang defending champion Yoyi's Pastries & Dessert midaog pinaagi sa 'default' batok sa Noah.
Agresibo kaayo ang mga magduduwa sa CRV diin unom kanila ang miiskor og double figures pinangulohan nilang Boyet Demol ug Bryce Tabaña nga parehong mibagnos og 16 puntos.
Sa halftime pa lang, ang CRV nakapanimaho na sa ilang sayong kadaogan human miposte og komportableng labaw, 40-26. Namintinar nila ang ilang labaw hangtod na sa katapusang gutlo sa duwa.
Laing miiskor og double digits sa CRV mao si Emman Reubal nga mitikdol og 14 puntos, Toper Lavandero nga mikadlit og 13 puntos ug silang Baki Rama ug JB Silvano nga mitimbre'g 12 puntos matag usa.
Anugon kaayo ang unom ka tres ni Val Ramirez kay wala kini makapadaog sa Angel Mary Pawnshop.
Sa kinatibuk-an, si Ramirez miantog og 24 puntos, samtang sila si Clark Del Mar ug Christian Lavandero nagtampohay og 18 puntos sa Angel Mary Pawnshop nga wala gyud makalabaw gikan sa pagsugod sa duwa.
Ang CRV ni Christian Roy Villacastin nagbitbit na karon og 3-3 nga baraha, samtang ang Angel Mary Pawnshop ni McLain Alkuino adunay 1-5 record ning maong liga nga nahimo pinaagi sa mga paningkamot sa FYA officers ubos sa liderato sa presidente niining si Dexter Caballero, bise presidente McLain Alkuino, Allan John Abella (secretary), Jonathan Cabanes (treasurer), Ranel Patalita, Takli Abella ug Jojie Martinez (pros), Toper Marata, Noel Medalle ug Christian Villacastin (board of directors), Arnel Trinidad, Boy Atillo ug Baeng Medalle (advisers).
PUNTOS MATAG USA
CRV (93) – Demol 16, Tabaña 16, Reubal 14, T. Lavandero 13, Rama 12, Silvano 12, Hanginon 6, Alicante 2.
ANGEL Mary Pawnshop (79) – Ramirez 24, Del Mar 18, C. Lavandero 18, Del Mar 8, Beast 6, Endrina 3.
- Latest
