Quincen nakamansa rekord sa limasawa sa Triple A tourney

CEBU, Philippines – Nakabangon dayon ang team Quincen human masugamak dihang ilang gipahimungtan ang Limasawa, 81-74 sa nagkainit nga aksiyon sa Allied Athletic Association (Triple-A) President's Cup 2018 niadtong Domingo didto sa Kimwa gym sa Subangdaku, dakbayan sa Mandaue.

Ang duha pareho  karong nagbitbit og 3-1 nga baraha, apan ang Quincen mao ang   nakakuha sa temporaryo nga liderato human sa ilang kadaogan sa Limasawa.

Sila si Richard Madrid ug Tawing Grafe nagkuridas og 18 puntos aron mangu sa scoring sa Quincen squad nga hiniusang gisuportahan nilang Eboy Quiñahan, Genemar Cena ug Roy Ermac.

Dili na malalis pa ang resulta sa dagan sa duwa dihang mitali sila og 68-51 nga labaw human sa tulo ka kuwarter.

Miburot pa ang labaw sa Quincen ngadto sa 77-55 nga maoy labing dako nila nga natala sa nahibiling 3:35 sa fourth quarter.

Bugtong konsolasyon sa Limasawa mao ang pagkitkit sa biya ngadto sa single digit.

Miiskor sab og 18 puntos si Rey Gonzaga aron pangulohan ang Limasawa, samtang sila si Bernard 'Boneth' Flores ug Francis Palero mitampo'g 12 ug 10 puntos sa napildeng Limasawa.

Sa laing bahin, ang Sniper midaog human ma-forfeit ang Monterroyo.

Ang Sniper ni Gilbert Lesin ug coach Christopher 'Crismart' Martinito aduna na'y 2-2 win-loss record, samtang ang Monterroyo ni Dr. Raul Monterroyo wala pa'y daog sa upat nila ka duwa ning maong liga nga namugna pinaagi sa paningkamot sa presidente niining si Alan Buenavista ug bise presidente Dodong Lurica.

Ang mga duwa gipadagan ni league commissioner Geryl Bukiron sa abag ni Orly Navarro.

PUNTOS MATAG USA

QUINCEN (81) – Madrid 18, Tawing 18, Gersam 8, Ermac 8, Dayanan 6, Navarro 6, Goc-ong 4, Mandawe 4.

LIMASAWA (75) – Gonzaga 18, Flores 12, Palero 10, Solana 9, Monternel 6, Cabrera 6, Gallego 4, Monterde 2, Lugas 2, Tayag 2.