Balkman mobalik sa San Miguel
CEBU, Philippines – Matuman gyud ang pangandoy sa San Miguel Beermen fans tungod kay mobalik ang import nga si Renaldo Balkman.
Si Balkman kinsa mitabang sa Alab Pilipinas pagsakmit sa ABL title, gikataho nga mosalmot na sa ensayo sa San Miguel karong adlawa. Gikuha siya isip replacement sa unang reinforcement import nga si Troy Gillenwater.
"Balkman's papers are now being processed and he'll definitely join the team's practice (Wednesday)," matud pa sa usa ka wala magpahingalan nga SMB official sa Sports5.
Ang kanhi NBA cager nga si Balkman miduwa kaniadto sa San Miguel niadtong tuig 2013, apan wala siya katiwas sa conference human siya gi-ban dihang nanghasi sud sa korte ug gituok iyang teammate nga si Arwind Santos.
Sa paglingkod ni PBA Commissioner Willie Marcial karong tuiga, ang liga milibkas sa ban ni Balkman ug makaduwa na kini og balik.
Ang Puerto Rican forward gipaabot nga moduwa uban sa Beermen karong Sabado batok sa Alaska Aces didto sa Dumaguete City.
Ang 6-foot-6 nga si Balkman gitan-aw nga maoy makatabang sa Beermen nga padayong misarasay bitbit ang 0-2 nga baraha sa nagpadayon nga Commissioner's Cup.
Si Balkman mi-average og 24.9 points ug 11.8 rebounds sa iyang pagduwa sa ABL.
- Latest