Pacquiao mihagit ni Mayweather og basketbol
CEBU, Philippines – Gihagit ni Manny Pacquiao si Floyd Mayweather Jr. nga mag-abot pag-usab, ning higayona sa basketball court ug dili sa boxing ring.
Si Pacquiao mipadala og imbitasyon sa kanhi niya karibal nga si Mayweather alang sa usa ka friendly game diin siya ang mo-host. Kini ang niturok sa huna-huna ni Pacquiao dihang nasayran niya nga mibakasyon si Mayweather dinhi sa Pilipinas.
Nagkahinabi na hinuon ang duha ka sikat nga boxing personality sa telepono diin personal nga gikumusta ni Pacquiao si Mayweather.
Si Pacquiao giingon nga miimbitar ni Mayweather sa pre-season game sa Maharlika Pilipinas Basketball League didto sa South Cotabato. Wala pa hinuo'y klarong kompirmasyon gikan sa undefeated boxing champion.
Una nang miingon si Mayweather nga naglaum siya nga makahimamat si Pacquiao sa iyang pagbakasyon dinhi sa Pilipinas.
“Hopefully we meet and probably have lunch or dinner. And see how it’s going with Manny and his team,” matud pa ni Mayweather sa Philippine Star, ang igsuong mantalaan sa Banat News.
Ang 41-anyos nga si Mayweather miretiro na sa boksing ug gikataho nga mosud na sa natad sa mixed martial arts (MMA).
Sila si Pacquiao ug Mayweather nagsangka niadtong tuig 2015 sa gihulagway nga "Fight of the Century" diin ang American boxer ang midaog pinaagi sa unanimous decision.
- Latest
