Columbian minantsahan ang record ng Rain or Shine
MANILA, Philippines — Hindi matanggap ng Columbian Dyip ang nalasap na 31-point loss sa Alaska.
Kaya naman wala silang ibang inisip kundi ang makabangon.
Binangga ng Dyip ang ang Rain or Shine Elasto Painters, 104-96, sa likod ng 34 points at 11 rebounds ni import John Fields sa 2018 PBA Commissioner’s Cup kahapon sa MOA Arena sa Pasay City.
Ito ang ikatlong panalo ng Columbian sa limang laro at ipinalasap ang kauna-unahang kabiguan ng Rain or Shine.
“That’s the way to bounce back from a loss,” sabi ni head coach Ricky Dandan sa kanyang Dyip. “We had no choice but to learn from that horrible loss to Alaska.”
Nagmula ang Columbian mula sa 103-134 kabiguan sa Alaska.
Nagdagdag si Rashawn McCarthy ng 23 points para sa Dyip kasunod ang 13 markers ni Jerramy King.
Humakot naman si import Reggie Johnson ng 30 points sa panig ng Elasto Painters.
KInuha ng Columbian ang 10-point lead, 46-36, sa gitna ng second quarter hanggang maagaw ng Rain or Shine ang kalamangan sa 73-70 sa third period.
Muling nakalayo ang Dyip bitbit ang 97-90 abante sa 4:27 minuto ng final canto mula sa three-point shot ni McCarthy.
Ang fastbreak layup ni Gabe Norwood ang nagdikit sa Elasto Painters sa 94-97 sa huling 2:47 minuto.
- Latest