Mayweather ayaw nang labanan si Pacquiao para sa isang rematch
MANILA, Philippines — Para kay American boxing legend Floyd Mayweather, Jr., isa nang saradong aklat ang pagkakaroon nila ng rematch ni Filipino world eight-divison champion Manny Pacquiao.
“I’m an old man now,” sabi ng 41-anyos na si Mayweather sa kanyang pagdating sa bansa kahapon ng umaga mula sa Bangkok, Thailand “There’s no more fighting for Floyd Mayweather.”
Sa loob ng apat na araw ay walang ibang gagawin ang 41-anyos na retiradong boksingero sa bansa kundi ang dumalo sa isang fashion show kasama ang mga dati at kasalukuyang Miss Universe kagaya nina 2015 winner Pia Wurtzbach at reigning titlist Demi-Leigh Nel-Peters ng South Africa at mamasyal.
Matatandaang tinalo ni Mayweather si Pacquiao via unanimous decision sa kanilang mega showdown noong Mayo ng 2015.
Matapos ito ay binigo naman ni Mayweather si Andre Berto noong Setyembre ng nasabing taon para ilista ang kanyang 49-0-0 win-loss-draw ring record kasunod ang paghahayag ng kanyang pagreretiro.
Muling umakyat ng boxing ring si Mayweather noong Agosto ng 2017 at umiskor kay dating UFC star Conor McGregor ng 10th round stoppage para sa kanyang 50-0-0 mark.
Bagama’t hindi na aktibo sa boxing ay inaabangan pa rin ni Mayweather ang laban ni Pacqiao kay WBA welterweight king Lucas Matthysse ng Argentina sa Hulyo 15 sa Kuala Lumpur, Malaysia.
“That's a good matchup, very exciting fight,” sabi ng American boxing great sa nasabing Pacquiao-Mathysse fight.
“Manny Pacquiao and Lucas Matthysse are great fighters. It's great matchup between two former world champions so it's going to be a very good fight,” dagdag pa nito.
Ito ang unang pagkakataon na lalaban ang 39-anyos na si Pacquiao matapos matalo kay Jeff Horn at maisuko ang suot na WBO welterweight belt noong Hulyo ng nakaraang taon sa Brisbane, Australia
Hangad ni Pacquiao na talunin ang 35-anyos na si Matthysse para muling makapagsuot ng world boxing crown.
Kung matatalo kay Matthysse ay posibleng makumbinsi si ‘Pacman’ na magretiro.
Bilang isang kapwa pro boxer ay umaasa si Mayweather na makakausap niya si Pacquiao.
“Hopefully we can sit down and meet, probably have lunch or dinner and just see how's everything been going for Manny and his team,” sabi nito.
Ilang beses ding napaulat ang pagsubok ni Mayweather na lumaban sa loob ng Octagon sa UFC.
Ngunit ito ay pinabulaanan ni Mayweather.
Matapos ang ilang oras na pahinga ay dumiretso si Mayweather sa El Nido, Palawan.
- Latest
