Fury mitusak 30 puntos kadaogan sa E-F Surplus
CEBU, Philippines — Mihimo na sab og kasikas si Fury ‘Triggerman’ Trazona diin mipatuasik siya og unom ka tres alang sa iyang team E-F Surplus nga padayong miratsada og daog dihang ilang gilarot ang Purok Gemilina, 98-75 sa J&J Surplus Season 12 basketball tournament niadtong Sabado didto sa GT Academy gym sa Tayud, Lilo-an.
Sa kinatibuk-an, si Trazona adunay game-high nga 30 puntos, aron pangulohan ang E-F Surplus nga nagpabiling lider sa bracket A sa ilang 5-0 win-loss record
Gawas ni Trazona, mipakita sab og nindot nga salida si Anton Tranghia nga miratsada og 20 puntos, ingon man silang Tingan Gestopa ug Kent Nuñez nga nagkumboya’g 23 puntos.
Biya og singko puntos ang E-F Surplus paghuman sa first period, 25-30, apan si Trazona nagmangtas ug gikalingawan nila’g kitkit ang labaw ug mao na ang miabante sa halftime, 48-44.
Mibingat ngadto sa 17 puntos ang labaw sa E-F Surplus, 72-55 ug kontrolado na nila ang duwa sukad niadto.
Si Harold Orque nga mitali og 18 puntos maoy nangu sa upat ka players sa P. Gemilina nga miiskor og double figures.
Sa laing duwa, ang Union Galvasteel mipilde sa Gramercy, 89-83 ubos sa pagpangu ni Manolito Dejarme nga mikabkab og 25 puntos.
Ang liga nahimo pinaagi sa paningkamot sa presidente niining si Henry Agbon sa abag ni commissioner Fury Trazona, ingon man nilang Russel Dacalos, Benny Bato, Jrax Tagalog ug Choy Pilapil.
PUNTOS MATAG USA
Unang duwa:
E-F Surplus (98) – Fury 30, Tranghia 20, Gestopa 12, Nuñez 11, Igoy 6, K. Sabang 5, Pepito 4, Betinol 2, Caballes 2.
Purok Gemilina (74) – Orque 18, Cobi 16, Salogaol 12, Queinda 11, Pilapil 8, Pilapil 6, Royakz 3.
Ikaduhang duwa:
UNION Galvasteel (89) – Dejarme 25, Boyles 17, Mantos 14, Capin 8, Flores 6, Macasero 6, Judaya 5, Lozano 4, Gellocane 2, Orongan 2.
GRAMERCY (83) – Wowie 21, Solon 20, Delfin 17, Bandoy 13, Joseph 8, Keith 2, Leboy 2.
- Latest
