Micaela nakaeskapo Angel Mary Pawnshop FYA season 21

CEBU, Philippines — Nakaeskapo ang Micaela bitbit ang 89-87 nga kadaogan batok sa Angel Mary Pawnshop sa kulbahinam nilang duwa sa FYA Season 21 Summer League 2018  basketball tournament niadtong Domingo didto sa Vicente Sotto gym sa Punta Princesa, dakbayan sa Sugbo.

Ang Micaela nilang Noel Medalle ug Edgar Noquillo gipangulohan ni Ryan Villaver nga mibagnos og 26 puntos, gisundan ni Ranel Patalita nga miamot og 18 puntos. Mipakita sab og maayong salida si Noel Medalle nga mitampo'g 11 puntos sa Micaela nga nagsolo sa ikaduhang dapit sa standing  sa ilang 4-1 win-loss record.

Ang 1-3 nga Angel Mary Pawnshop gipangulohan mismo sa ilang manedyer nga si McLain Alkuino nga milansang og 23 puntos.

Agresibo kaayo ang Angel Mary Pawnshop sa sayong bahin sa duwa nga nakapaabante kanila, 18-0 sa first quarter.

Bisan pa sa dakong labaw, ang Micaela imbes maluya nadasig hinuon  sa pakigbisog ug hinay-hinay nilang gikitkit ang labaw sa Angel Mary Pawnshop hangtod nga nahilis. Didto na nilabaw ang Micaela sa nahibiling singko minutos sa fourth quarter.

 Gihatagan unta og higayon ang Angel Mary Pawnshop  aron maka-overtime sa katapusang sayes segundos sa duwa, apan wala masulod ang undergoal ni Macmac Encarquez.

Si Val Ramirez miamot og 11 puntos sa naremating Angel Mary Pawnshop nga nagtangag karon og 1-3 record.

Sa laing aksiyon, ang CRV mirehistro sa ikaduhang sunod-sunod nilang daog human gipilde ang Noah, 85-76 ubos sa pagpangu ni Dandan Enriquez nga miratsada og 24 puntos.

Sila si Mark Demol ug Toper Lavandero nagtampohay og 14 puntos sa CRV ni Christian Roy Villacastin nga aduna na'y 2-3 nga baraha.

Tulo sab ka Noah players ang miiskor og double figures pinangulohan ni Javinille Enriquez nga mikabkab og 28 puntos, gisundan ni Dodee De Gracia nga miabuno'g 20 puntos ug Inting Baldonato nga miariya'g 15 puntos.

Ang Noah ni Jobert Barro nagbitbit na og 1-3 nga baraha ning maong liga nga nahimo pinaagi sa paningkamot sa mga opisyales sa FYA  ubos sa liderato sa presidente niining si Dexter Caballero.

Si Brgy. Capt. Boy ‘Boggey’ Atillo uban nilang Arnel Trinidad ug Baeng Medalle mitabang sab sa pagpadagan sa maong liga.

Puntos Matag usa

Unang duwa:

CRV (85) – D. Enriquez 24, Demol 14, Lavandero 14, Alicante 6, Cueme 6, Tabaña 5, Dacayana 3, Silvano 2.

NOAH (76) – J. Enriquez 28, De Gracia 20, Baldonato 15, Abella 9, Sarsaba 2.

Ikaduhang duwa:

  MICAELA (89) – Villaver 26, Patalita 18, N. Medalle 11, Marata 9, R. Tabares 7, J. Noquillo 5, E. Noquillo 4, Tabares 4, Abay 2, Abella 1.

ANGEL Mary Pawnshop (87) – Alkuino 23, Ramirez 11, Endrina 9, Del Mar 8, Encarquez 8, Godofredo 7, Mendoza 7, Encarquez 6, Samson 4.