Matthysse: Pacquiao hinay, sayon ig-on

CEBU, Philippines — Alang ni WBA welterweight champion Lucas Matthysse, hagbay ra nga nahanaw ang mga mabulukong adlaw ni Manny Pacquiao ug karon maoy labing tukmang panahon aron papahuwayon na ang Pinoy ring star.

Si Matthysse nga modepensa sa iyang titulo batok ni Pacquiao karong Hulyo 15 didto sa Kuala Lumpur, Malaysia, nagkanayon nga haum kaayo ang estilo ni Pacman alang kaniya. 

“I really like his style. We have the same height, he is a fighter who comes forward and who likes to attack like me, so that is going to be good for my way of boxing,” matud pa sa garbo sa Chubut, Argentina segun sa taho sa boxingscene.com.

Mas labaw hinuon nga nakapadasig kaniya ang pagtuo nga mibahar na ang abilidad ug talisaop na ang karera sa bugtong eight-division world champion sa kasaysayan.

Sa laing bahin, gidugang ni Pacquiao si Nonito Donaire Sr. isip sakop sa iyang coaching staff. 

Si Nonito Sr. migiya sa iyang anak nga si Nonito ‘The Filipino Flash’  Donaire Jr. ngadto sa lima ka world titles sa managlahing weight division. 

Ikatrabaho unya ni Nonito Sr. sila si Buboy Fernandez ug Nonoy Neri sa pagbaid sa abilidad ni Pacquiao nga moaway sa labing unang higayon nga wala sa iyang corner si Hall of Fame trainer Freddie Roach.