Central Visayas mibalik sa No. 4 sa Palaro
CEBU, Philippines – Natuman gyud ang misyon sa Central Visayas Athletic Association nga makuha ang No. 4 overall sa 61st Palarong Pambansa nga natapos kagahapon didto sa Quirino Stadium sa Vigan, Ilocos Sur.
Dako kining kalampusan alang sa Central Visayas nga una nang mibahad nga mamawi human sa makauuwaw nga ninth place finish sa miaging tuig didto sa Antique.
Ang Central Visayas mitapos sa usa ka semana nga kompetisyon bitbit ang 26 gold, 23 silver ug 31 bronze medals.
Sa gilauman, ang powerhouse nga National Capital Region mao gihapon ang midominar sa ilang 100 golds, 70 silvers ug 50 bronzes. Ang Calabarzon maoy ikaduha sa ilang 55-50-73 gold-silver-medal,
samtang ang Western Visayas adunay 46-45-55 medal tally.
Kulbahinam ang fourth place sa CV kay sikit kaayo kanila ang CARAA nga adunay 25-22-23 medal tally. Ang NMRAA maoy fifth placer sa ilang 23-18-29 medals.
Ang Boholano nga si Gerwin Asilo maoy mihatod sa katapusang bulawan sa CVIRAA pinaagi sa boxing sa bantamweight division batok ni Charls Conel sa Western Visayas. Si Eduardo Jimenez mitunol og silver medal, samtang ang mga bronze medals gihatag nila ni Jorge Anthony Llamado, Eric James Opus ug Vicente Sios-e Jr.
Naka-silver sab ang elementary football sa CVIRAA, samtang ang secondary girls team midaog og silver sa 3-on-3 basketball.
- Latest
