Roach, Pacquiao buwag na gyud
CEBU, Philippines — Si Hall of Fame trainer Freddie Roach na mismo ang mikompirmar nga nagbuwag ang dalan nilang Pinoy ring star Manny Pacquiao.
Sa hamubo niyang pamahayag, si Roach nagkanayon nga ang 15 ka tuig nilang panag-uban ni Pacquiao giputol sa wala pa ang away sa labing banggiitan nga boksingero nga nag-agi sa iyang mga kamot batok ni WBA welterweight champion Lucas Matthyse.
Kay lagi sila may pinagsamahan, gipanghinautan gihapon ug kamaayohan ni Roach si Pacquiao, apan iyang giangkon nga nasakitan siya human masayod nga yano ra siyang gideritso og taktak sa bugtong eight-division world champion.
“Manny and I had a great run for 15 years -- longer than most marriages and certainly a rarity for boxing,” matud pa ni Roach. “I wouldn’t trade any of it. Inside the boxing ring and the political ring, I wish Manny nothing but the best.”
Human gipalagpot si Roach, si Pacquiao mitudlo sa sumpay sa pusod niyang higala ug dugay na kaayo niyang assistant trainer nga si Buboy Fernandez aron maoy mangu sa iyang corner sa iyang paghagit ni Matthysse karong Hulyo 15 didto sa Kuala Lumpur, Malaysia.
Si Pacquiao wala na makaaway pa sukad nahuboan sa iyang WBO welterweight title ni Jeff Horn pinaagi sa controversial split decision niadtong Hulyo 2 sa miaging tuig didto sa Brisbane, Australia.
- Latest