Alab Pilipinas puwersado sa outright semis berth
Laro Ngayon (Caloocan City Sports Complex)
8 p.m. Alab Pilipinas vs CLS Knights Indonesia
MANILA, Philippines — Inaasahan ang mainit na laban sa paghaharap ng San Miguel-Alab Pilipinas at CLS Knights ng Indonesia ngayon sa pagpapatuloy ng 8th ASEAN Basketball League (ABL) sa Caloocan Sports Complex sa Caloocan City.
Target ng tropa ni coach Jimmy Alapag ang pang-13th panalo para muling tumuntong sa ikatlong puwesto sa kanilang pakikipagtipan sa CLS Knights sa alas-8 ng gabi.
Sa kanilang 12-6 win-loss kartada, bumaba ang Alab Pilipinas sa pang-apat na puwesto matapos magwagi ang Mono Vampire ng Thailand kontra sa dating nangunguna at nagdedepensang Hong Kong Eastern Lions, 119-111 noong Marso 15.
Dahil sa panalo ng Thailand team umangat sila sa ikatlong puwesto sa 13-6 slate sa likuran ng nangungunang Chong Son Kungfu ng China (14-5) at pumapangalawang Eastern Lions (12-5).
Kailangan ng Filipino team na manalo sa CLS Knights upang muling makabalik sa third spot.
Nanatili pa ring buhay ang pag-asa ng Alab Pilipinas na masungkit ang top two slots para makakuha ng outright entry sa semis ngunit hindi na nila hawak ang kanilang tsansa dahil may tatlong laro pang natitira ang Hong Kong Eastern Lions at isa sa Chong Son Kungfu.
Kaya ang tsansa na outright semis ng Alab Pilipinas ay depende sa resulta ng mga krusyal na laro sa homestretch ng elimination.
- Latest
