NLEX Road Warriors positibo makatabla
CEBU, Philippines — Anaa sila sa lisud nga kahimtang, apan si NLEX Road Warriors coach Yeng Guiao pabiling positibo nga dili pa sila mataktak sa semifinals ug mapugos nila ang usa ka ‘do-or-die’ Game 7 batok sa Magnolia Hotshots.
Ang NLEX biya sa serye 2-3 human sa ilang 78-87 nga kapildihan sa Game 5 niadtong Domingo.
Miangkon si Guiao nga usa ka dakong pagsuway ang ilang giatubang aron modaog sa Game 6 karong gabii didto sa Smart Araneta Coliseum.
Si Guiao wala kapugong sa pagbasol sa mga reperi sa duwa sa Game 5 tungod sa nakita niya nga mas pabor nga tawag sa Magnolia, apan dili na niya kini usikan og panahon tungod kay humana ang duwa. Maglaum si Guiao nga makahimo sila og nindot nga sugod sa duwa dili sama sa miaging duwa diin sila ang gagukod.
Ang NLEX moduwa nga wala ang usa sa ilang star point guard nga si Kevin Alas kay nakahiagum og injury ug gikahadlokan nga dugay pa makabalik.
Ang Road Warriors mosandig karon nila ni Kiefer Ravena, JR Quiñahan, Cyrus Baguio ug Larry Fonacier aron maoy mohatag kanila sa daog.
Hinuon si Magnolia coach Chito Victolero miingon nga andam na ang tanan ug makuha nila ang katapusang luna sa finals diin nagpaabot ang igsuon nilang koponan San Miguel Beermen.
Si Victolero mideklarar nga anaa kanila ang ‘momentum’ ug dili sila motugot nga moabot ang series sa Game 7. (BANAT NEWS)
- Latest