Mururi, sorongon hari sa Vertical Run 2018

CEBU, Philippines — Ang Kenyan nga si Joseph Mururi ug Ruffa Sorongon maoy nanghawod sa tagsa-tagsa nila ka dibisyon sa labing unang Horizon 101 Vertical Run 2018 kagahapon sa buntag didto sa Tower 1 sa Horizons 101 sa General Maxilom Avenue, dakbayan sa Sugbo.

Imbes sa  kadalanan maginukdanay, ang   runners naglumba pasaka  sa maong edipisyo. 

Si Mururi naghari sa men’s full 55 challenge sa oras nga 12 minutos ug 19 segundos, gisundan ni Lawrence Furo nga mioras og 12:45. Ang kababayan ni Mururi nga si Elliud Kering mitapos sa ikatulo sa oras nga 12:46.

Sa pikas bahin, si  Sorongon maoy milangkat sa korona sa iyang oras nga 16:30, sila si Lovely Fe Andrin (17:01) ug Glee Largo (18:04) maoy miangkon sa mosunod nga duha ka dapit.

Sa laing bahin, ang tandem nilang  Ian Refuela ug Michael Largo maoy midaog sa relay category sa oras nga 11:22, gisundan sa tandem nila ni Jose Baguio ug Jayson Lopido (11:48) ug nilang Ariel Saballa ug Azlan Pagay (12:07) nga mipahiluna sa ikaduha ug ikatulong dapit.

Sa men’s fun climb, si Sherwin Moh mao ang naghari human niya gitapos ang lumba sud lang sa nuybe minutos. Iyang gipilde silang Earl Peonila (09:01) ug Paul James Safico (09:36) alang sa ikaduha ug ikatulo nga dapit.

Si Cherry Andrin mao sab ang kampiyon sa women's division sa oras nga 10:59, gisundan nila ni  Kay Razel Cundangan (12:30) ug Jade Abellana (12:41).