Crafword mibawos og pika ni Horn
CEBU, Philippines — Human miatras ang wa’y pildeng si Terence Crawford sa gikatakda niining welterweight title bout batok ni Jeff Horn karon untang Abril 14 tungod sa injury sa iyang kamot, kanunay nga gikuwestiyon ang iyang kalig-on sa kampo sa iyang kaatbang.
Si Crawford (32-0, 23KOs) nga miharos sa tanang titulo sa junior welterweight division sa miaging tuig, moaway unta isip welterweight sa labing unang higayon batok ni Horn (18-0-1, 12KOs) nga mipakugang sa kalibotan sa boksing human gipukan si Manny Pacquiao pinaagi sa ‘split decision’ niadtong Hulyo 2017 didto sa Australia.
Apan samtang gitan-aw sa iyang mga sakop ang iyang injury nga dili seryoso ug gamay ra kaayong lugak sa ilang dalan gihimo kining dako nga isyu sa kampo ni Horn. Gani, si Horn ug ang iyang trainer nga si Glenn Rushton mipatawag pa og press conference sa Australian media aron ipahungaw ang ilang kaligutgot.
Matud pa ni Horn nga nadismaya siya sa dagan sa hitabo ug nanghinaut nga dili kini usa ka taktika ni Crawford aron gub-on ang ilang plano.
Samtang si Rushton mitawag ni Crawford nga usa ka ‘princesa’. Alang niya, si Crawford usa ka huyang nga boksidor kay wala kini igong kaisog nga mopadayon sa away ilabi na kay dili man seryoso ang injury niini.
Apan pinaagi sa social media, si Crafword mibawos og labtik sa iyang mga karibal.
Mibahad si Crawford ngadto nilang Horn ug Rushton nga tan-awon lang unya nila ang gitawag nilang ‘princesa’ nga mokulata og maayo ni Horn sa adlaw sa away nga giuswag sa nanghinapos nga bahin sa Mayo o sa unang semana sa Hunyo.
- Latest