Raptors padayong nagmangtas

CEBU, Philippines — Ang Toronto Raptors padayong miratsada, apan nag-agi una og overtime sa wala pa pildiha ang Dallas Mavericks, 132-115  alang sa ika-11 nilang daog sa NBA kagahapon didto sa Air Canada Center sa Toronto, Canada.

Si DeMar DeRozan mipatuasik og 29 puntos, apil na ang iyang jump shot sa nahibiling 53.1 segundos sa overtime nga nakapalabaw sa Raptors, 117-115.

Si Jonas Valanciunas milansang dayon og lima sa unom niya ka free throws sa himalatyong segundos aron pagsilyo sa makutas nga daog sa Raptors. Mitapos siya uban ang 21 puntos ug 12 ka rebounds.

Didto sa Oakland, si Buddy Hield milansang og tulo ka krusyal nga free throws sa katapusang 27.5 segundos sa duwa dihang giparot sa Sacramento Kings sa ikaduhang higayon karong season ang  Golden State Warriors sa homecourt sa nauwahi, 98-93. 

Si Hield mitapos uban ang 22 puntos, pito ka assists ug pito ka rebounds.

Si Quinn Cook mikadlit og career-high 25 puntos alang sa Warriors nga napiangan human mayayay si Kevin Durant ug dili makaduwa sud sa duha ka semana. Mibalik man tuod si Draymond Green gikan sa usa ka duwa diin mitali siya og 14 puntos, 10 ka rebounds, upat ka steals ug duha ka blocks, apan wa’y nahimo ang Warriors nga hangtod karon padayong nagpaabot sa pagbalik nilang Stephen Curry, Klay Thompson ug Omri Casspi nga pulos na-injured.

Sa uban pang mga resulta, ang Boston Celtics mibaraw sa Orlando Magic, 92-83, samtang ang Philadelphia 76ers mipakaging sa Brooklyn Nets, 120-116, si Russell Westbrook miposte sa ikaupat niyang sagunson nga ‘triple-double’ aron pangulohan ang Thunder ngadto sa 121-113 nga kadaogan batok sa Los Angeles Clippers.