Biyaheng Finals sa Beermen

Laro Ngayon(Ynares Center, Antipolo City)

6:30 p.m. NLEX vs Magnolia (Game 5, Semis)

MANILA, Philippines — Aminado si NLEX guard Kevin Alas na mas eksperyensado sa kanila ang Magnolia pagdating sa semifinals series.

“I have to admit na mas experience sila kesa sa amin, pero siguro ‘yung advantage namin is we’re hungry na this is our first time here sa semifinals,” ani Alas, kumamada ng 13 points, 6 rebounds at 5 assists sa 91-79 pagpapabagsak ng Road Warriors sa Hotshots sa Game Four noong Biyernes para itabla ang kanilang semifinals series sa 2018 PBA Philippine Cup.

Pag-aagawan ng NLEX at Magnolia ang mahalagang 3-2 bentahe sa kanilang best-of-seven semifinals showdown sa Game Five ngayong alas-6:30 ng gabi sa Ynares Center sa Antipolo City.

Bago maitabla ang serye sa 2-2 ay naisuko ng Road Warriors ang Game Two at Game Three, 84-99 at 99-106, ayon sa pagkakasunod.

“The experience to be playing in the semifinals for as many times as they have is really valuable, napakaimportante ng experience na wala kami as a team,” sabi ni coach Yeng Guiao sa unang semis stint ng kanyang NLEX.

Bukod kay Alas, muli ring sasandigan ng Road Warriors sina rookie sensation Kiefer Ravena at veterans Cyrus Baguio, Alex Mallari, JR Quiñahan katapat sina Paul Lee, Ian Sangalang, Mark Barroca, Jio Jalalon, Rome Dela Rosa at Rafi Reavis ng Hotshots.

“Just to tie a series 2-2, for us that’s a moral victory,” ani Guiao. “Kahit salit-salitan na lang, pagdating sa Game 7 parang toss-coin na lang ’yun. We take that chance. OK na kami roon.”

Umaasa naman si Magnolia mentor Chito Victolero na makakaba­ngon sila sa kabiguan para makalapit sa inaasam na ika-28 PBA Finals a­ppearance at tatargetin ang pang-14 korona.