World-class MTB Duathlon sa Lacion

CEBU, Philippines — Plansado na ang tanan alang sa Consolacion Mountain Bike Duathlon 2.0  ugma sa buntag  nga magsugod ug mahuman diha sa SM City-Consolacion.

Human sa Bike Out sa miaging semana aron paghatag sa mga partisipante og higayon nga makapamilyar sa rota sa lumba, ang mga organizers nga gipangulohan ni Alan G. Choachuy miabli kagahapon sa duha ka adlaw nga Expo aron pagdugang og kabibo sa ilang kalihukan.

Gikan sa 298 ka mga entrante sa una nilang edisyon sa miaging tuig, mitubo ang numero ngadto sa 351 ka mga atleta gikan sa nagkadaiyang dapit sa nasud ang mosalmot ning higayona.

Gawas sa kulbahinam nga aksiyon, ang mga entrante makalantaw sab sa unahan sa makadani nga mga ganti.

Gawas sa tropeyo, ang nag-unang tulo ka mananaog sa Elite category mobulsa og ganting salapi. 

Isip dugang bonus, ang makampiyon makadawat sab og Lazer eyewear nga nagkantidad og P7,500 gikan sa Cycle Logic ug OOFOS recovery footwear.

Ang manghawod matag age-group (18-under, 19-24, 25-29, 30-34, 35-39, 40-44, 45-49 ug 50-above) makakuha sab og Lazer eyewear nga nagkantidad og P4,200 kortesiya sa YKK Bikes, samtang ang labing paspas sa tanang mga age groupers makadawat og OOFOS footwear ug recovery calf sleeves socks sa OS1st.

Dugang niini, ang labing paspas nga 5km lalaki ug babayeng runner hatagan og Altra running shoes, samtang ang coolest runner dunay Goodr shades ug Feetures.

Kadtong makahuman sud sa cut-off time nga upat ka oras ug 30 minutos dunay medalya ug souvenir shirts. Ang tanang entrante duna sa’y libreng paniudto ug dunay kahigayonan nga makadaog og  ganti sa raffle draw.