Nietes andam na mosaka sa taas nga timbang
CEBU, Philippines — Kun siya ang pabut-on, si Donnie ‘Ahas’ Nietes gusto nang mokatkat sa super flyweight division sa sunod niyang away aron tumanon ang iyang damgo nga mamahimong usa ka four-division world champion.
Nagtuo si Nietes nga andam na siyang mosakmit og laing titulo sa mas taas nga timbang bisan og dili na siya mag-agi pa og usa ka tune-up bout.
Pipila ka adlaw human makadepensa sa iyang korona isip IBF flyweight champion human gipalukapa si Juan Carlos Reveco sa Argentina sa miaging bulan didto sa The Forum sa Inglewood, California, gisaytan dayon ni Nietes ang kanhi pound-for-pound king nga si Roman ‘Chocolatito’ Gonzalez sa Nicaragua alang sa bakanteng WBO super flyweight belt.
Gawas ni Gonzales, gitiradahan sab sa garbo sa Murcia, Negros Occidental nga miaway ubos sa ALA Gym ang Mehikanong bitoon sa ring nga si Juan Francisco Estrada.
“World title fight na agad, kapag tune-up pa baka magkaproblema pa,” matud pa ni Nietes segun sa taho ni Nelson Beltran sa The Philippine Star, igsuon mantalaan sa Banat News.
Gawas nga usa ka three-division world champion, si Nietes giyukboan sab nga longest reigning Filipino world boxing champion. Wala siya’y pilde sukad niadtong tuig 2004 ug nagharing kampiyon sud sa usa na ka dekada.
- Latest
