P65T nga ganti sa Cebu City airsoft competition
CEBU, Philippines — Miabot ngadto sa P65,000 nga ganting salapi ang gitagana alang sa mga mananaog sa 2018 Cebu City Open Airsoft Competition nga giulohan og “Operation: Fall Out” karong Abril 7-8 diha sa Sugbo grounds sa South Road Properties.
Ang makampiyon ning duha ka adlaw nga kompetisyon nga gipaluyohan sa kagamhanan sa dakbayan sa Sugbo ubos sa liderato ni Mayor Tommy Osmeña ug nilang deputy mayors for sports Jerry L. Guardo ug Jun Gabuya mobulsa og P30,000, ang mopahiluna sa ikaduha hangtod sa ikaupat nga dapit makadawat og P20,000, P10,000, ug P5,000.
Katorse lamang ka slots ang gitagana ning 21-man team competition nga giabagan sab sa Cebu City Sports Commission pinaagi ni commissioner Alan Borres Delantar ug sa pagtambayayong sa Southern Cebu Airsoft Recon (SCAR) ubos sa paggiya sa presidente niining si Francis Jaca ug team leader Jeson L. Guardo ug sa Guadalupe Airsoft Team (GAT) nga gipangulohan ni Teban Baylon.
Alang sa rehistrasyon ug dugang impormasyon, kadtong mga interesado mahimong motawag ni event coordinator Ian Luga (0922-8680737). (BANAT NEWS)
- Latest