2nd Gov's Cup U21 basketball nakadani'g 45 teams

CEBU, Philippines — Miabot ngadto sa 45 ka teams gikan sa pito ka distrito sa probinsiya sa Sugbo ang mopakita’g aksiyon sa 2nd Cebu Governor’s  Cup  Inter-Cities and Municipalities Under-21 Developmental Basketball Tournament nga mosikad karong Abril 15 diha sa Cebu Coliseum.

Gikan sa 37 ka local government units sa unang season sa miaging tuig, mas midaghan ang LGUs nga mokumbati ning higayona.

Moduwa ang Talisay City, Minglanilla, Naga City, San Fernando, Carcar City ug Sibonga ubos sa 1st District, ang Argao, Dalaguete, Alcoy, Boljoon, Oslob, Santander ug Samboan sa 2nd District, ang Barili, Aloguinsan, Balamban, Asturias ug Tuburan sa 3rd ug ang Tabuelan, San Remigio, Medellin, Daanbantayan, Santa Fe, Bantayan, Madridejos, Tabogon ug Bogo City sa  4th District.

Magtige sa 5th District ang Danao, Borbon, Sogod, Catmon, Carmen, Compostela, San Francisco, Poro ug Tudela. Ang  Consolacion, Cordova ug Mandaue City magpinaksitay sa 6th District, samtang ang Ginatilan, Alegria, Moalboal, Alcantara, Badian ug Dumanjug magsangka sa 7th District.

Sa laing bahin, ang Cebu Provincial Sports Commission (CPSC) mipahigayon og refresher course/seminar alang sa 150 ka coaches ug assistant coaches sa mga entranteng LGUs. 

Ang tulo ka adlaw nga kalihukan nagsugod  kagahapon diha sa Mandaue City Cultural and Sports Complex ug mahuman karong Huwebes. (BANAT NEWS)