Rockets pabiling nag-una

CEBU, Philippines — Si James Harden mikadlit og 28 puntos sa dihang gipahugtan sa Houston Rockets ang ilang pagkupot sa liderato sa Western Conference human nila gilubong ang San Antonio Spurs, 109-93 sa NBA kagahapon didto sa Toyota Center sa Houston, Texas.

Ang nag-unang kandidato pagka-MVP karon nga season nga si Harden milangkat sab og unom ka rebounds ug unom sab ka assists alang sa Rockets nga pabiling nag-una sa standings bitbit   ang   53-14    record. 

Ilang gipalapdan ang ilang labaw sa Golden State Warriors ngadto na sa duha ka duwa. Nabulahan hinuon ang Warriors sa kadaogan sa Rockets gumikan kay nagseguro kini sa ilang pagsud sa playoffs sa ikaunom nga sunod-sunod nga season.

Miabag ni Harden mao si Chris Paul nga mihipos og 18 puntos uban ang siyam ka assists ug tulo ka rebounds. Wala sab magpabitin sila si Trevor Ariza, Clint Capela ug Gerald Green nga nagkumboya’g 42 puntos.

Samtang nagmaya ang Rockets, nagkalawom ang problema sa Spurs nga padayong nagkagidlay nga wala silang Kawhi Leonard ug LaMarcus Aldridge gumikan sa injury.

Pait kaayo ang maong kaparotan gumikan kay nakapadag-om kini sa tsansa sa Spurs nga makasud sa playoffs. Mao kadto ang ika-11 nilang pilde sa katapusan nilang 14 ka duwa.

Ang Spurs natagak karon sa ika-10 nga puwesto ug kinahanglan nga mamawi sa nahibilin nilang mga duwa aron dili makapalta sa playoffs sa labing unang higayon sukad niadtong 1996-1997 season.

Masaligon hinuon si coach Gregg Popovich sa ilang tsansa nga makasud sa playoffs.

Sa laing duwa, si Russell Westbrook naka-’triple double’ na sab sa dihang giinat sa Oklahoma City Thunder ang ilang daog ngadto sa 40 karon nga season human gipakaging ang Sacramento Kings, 106-101. 

Si Westbrook mitapos uban ang 17 puntos, 10 ka rebounds ug 11 ka assists. (BANAT NEWS)