Beermen at Gin Kings mag-uunahan sa 1-0 lead sa semis
Laro Ngayon: (Smart Araneta Coliseum)
7 p.m. San Miguel vs Ginebra (Game 1, Semis)
MANILA, Philippines — Bukod sa ikaapat na sunod na pagdomina sa PBA Philippine Cup ay may isa pang mahalagang bagay na nagpapasigla kay San Miguel head coach Leo Austria.
Ito ay ang kanyang asawang si Ana na matagumpay na sumailalim sa isang kidney operation noong Martes bago sibakin ng Beermen, ang No. 1 team sa elimination round at nagbitbit ng ‘twice-to-beat’ advantage sa quarterfinals, ang No. 8 TNT Katropang Texters, 106-93, sa kanilang quarterfinals match-up.
“We know that he had a heavy heart and he hasn’t been getting much sleep. He’s been with us at practice every day, hasn’t complained about it, hasn’t brought it up, hasn’t mentioned it,” sabi ni San Miguel guard Chris Ross kay Austria. “That’s just a testament to the type of professional that he is.”
Nakatakdang labanan ng Beermen ang Ginebra Gin Kings ngayong alas-7 ng gabi sa Game One ng kanilang best-of-seven semifinals series sa Smart Araneta Coliseum.
Winalis ng No. 4 Ginebra ang No. 5 Rain or Shine, 88-80 at 99-91, sa kanilang best-of-three quarterfinals showdown para itakda ang kanilang semis wars ng San Miguel.
Inaasahang sasandal ang Beermen kay four-time PBA MVP June Mar Fajardo sa kanilang serye ng Gin Kings, maaaring hindi pa magamit si seven-foot center Greg Slaughter dahil sa sprained ankle injury nito.
"Big thing for us is whether Greg can play. That will really help us equalize. That would be the great equalizer," sabi ni coach Tim Cone.
Nauna nang tinalo ng Ginebra ang San Miguel, 100-96, noong Enero 28.
Samantala, bubuksan ng Magnolia at NLEX ang kanilang sariling semis duel bukas ng alas-6:30 ng gabi.
Sinibak ng Hotshots, ang No. 2 team sa eliminasyon, ang No. 7 Globalport Batang Pier, 86-79, habang winalis ng No. 6 Road Warriors ang No. 3 Alaska Aces, 105-99 at 87-83, sa kanilang quarterfinals series.
- Latest
