Nietes itataya ang korona
MANILA, Philippines — Ito ang pinakahihintay na pagkakataon ni Filipino world flyweight champion Donnie 'Ahas' Nietes.
Sa harap ng mas malaking bilang ng mga boxing fans ay itataya ni Nietes ang kanyang suot na International Boxing Federation flyweight crown laban kay mandatory challenger Juan Carlos Reveco ng Argentina sa 'SuperFly 2' sa The Forum sa Inglewood, California ngayon (Manila time).
Ito ang unang pagtatanggol ni Nietes (40-1-4, 22 KOs) sa kanyang hawak na IBF title na napanalunan kay Thai Komgrich Nantapech sa Cebu City noong Abril ng nakaraang taon.
Hindi pa natatalo ang 35-anyos na tubong Murcia, Negros Occidental sapul noong 2004 kung saan niya binasag ang record ni Gabriel 'Flash' Elorde bilang pinakamatagal na Pinoy champion.
Minsan namang naging flyweight king ng World Boxing Association ang 30-anyos na si Reveco (39-3-0, 19 KOs) na naghahangad na magaaw kay Nietes ang bitbit nitong IBF belt.
Kung tatalunin si Reveco ay maaaring umakyat si Nietes sa super flyweight division para labanan si dating 'pound-for-pound' king Roman ‘Chocolatito’ Gonzales ng Nicaragua.
Dalawang beses tinalo ni Srisaket Sor Rungvisai ng Thailand si Gonzalez para sa World Boxing Council super flyweight title.
Lalaban din si Rungvisai (44-4-1, 40 KOs) sa 'Super Fly 2' bilang main event kasagupa si two-belt flyweight king Juan Francisco Estrada (36-2-0, 25 KOs).
Samantala, makakatapat ni dating world two-division titlist Brian 'The Hawaiin Punch' Viloria (38-5-0, 23 KO) sa nasabi ring boxing card si Artem Dalakian (15-0-0, 11 KOs) ng Ukraine para sa bakanteng WBA flyweight belt.
- Latest