Gilas dapa sa Aussies
Laro sa Linggo(MOA Arena, Pasay City)
7:30 p.m. Gilas vs Japan
MANILA, Philippines — Nakakuha na ng kanilang katapat ang Nationals.
Matapos magtala ng 2-0 record ay nalasap ng Gilas Pilipinas ang kanilang unang kabiguan nang kunin ng mas malalaking Australia ang 84-68 panalo sa second window ng 2019 FIBA World Cup Asian Qualifiers kahapon sa Margaret Court Arena sa Melbourne.
Nauna nang tinakasan ng Nationals ang mga Japanese, 77-71 sa Tokyo at dinaig ang mga Taiwanese, 90-83 sa Big Dome noong Nobyembre.
Tumapos si four-time PBA MVP June Mar Fajardo na may 15 points, makaraang tumipa ng 7 markers sa first half ay 1 point lamang ang naiskor ni naturalized center Andray Blatche sa kabuuan ng second half.
“The good thing about this game is now we know we can take them,” sabi ni national head coach Chot Reyes sa Gilas Pilipinas, nakatakdang labanan ang Japan sa Linggo sa Mall of Asia Arena sa Pasay City.
Ang ikatlong sunod na panalo naman ng mga Boomers ang nagbigay sa kanila ng solong liderato sa Group C.
Kinuha ng Gilas Pilipinas ang 26-21 abante mula sa basket ni Fajardo sa second period bago agawin ng Australia, ang No. 10 sa FIBA world rankings at No. 1 sa Asia, ang halftime, 37-32.
Sa third quarter ay itinala ng mga Boomers ang 10-point lead, 54-44 buhat sa dalawang free throws ni 6-foot-10 Angus Brandt sa 3:11 minuto nito.
Pinalobo ng Australia ang kanilang kalamangan sa 68-49 mula sa three-point shot ni Kevin Lisch at dalawang charities ni Jason Cadee sa pagbubukas ng final canto.
Mula rito ay hindi na nakabangon ang Gilas Pilipinas.
- Latest
