3 ka sugboanon moapil sa 500k Ultra Marathon

CEBU, Philippines — Sukdon sa tulo ka Sugboanong ultra runners sa pagpangu ni Edwin Colina kun asa gyud sila kutob sa dihang mosalmot sila si Zark’s Burger Ultimate Run, ang labing taas nga ultra marathon sa nasud nga naglangkob og 500 ka kilometro nga rota gikan sa Pasuquin, Ilocos Norte ngadto sa Memorial Circle sa Quezon City.

Gawas ni Colina, lain pang mga pambato sa Sugbo sa maong makabuak og dughan nga lumba nga sugdan karong alas-3 sa hapon mao sila si Jussell Ramirez ug Rosella Abajo, ang bugtong babaye sa grupo. Napulo lamang ka ultra marathoners ang kompirmadong moapil ning lima ka adlaw nga dinaganay, apil na niini ang tulo gikan sa Negros Occidental ug ang duha ka Pinoy nga atua na magbasi sa Ireland nga sila si Rolando Espina ug Jive Tolentino.

Sulagma kaayo nga wala’y taga Luzon nga miapil bisan pa og didto sa ilang dapit ipahigayon ang maong event.

“Ni-join mi ani to test our endurance kun asa gyud kutob,” matud pa ni Colina, kansang labing taas nga rota nga iyang nahuman mao ang 280K ultra marathon gikan sa Santander ngadto sa Daanbantayan. (BANAT NEWS)