Nietes nanganti
CEBU, Philippines — Misaad si three-division world champion Donnie ‘Ahas’ Nietes nga mopakita sa labing nindot nga away sa iyang karera sa umaabot niyang pagdepensa sa iyang IBF flyweight title batok ni Argentine challenger Juan Carlos Reveco karong Pebrero 24 (Pebrero 25 oras dinhi sa Pilipinas) didto sa The Forum sa Inglewood, California.
Upat ka adlaw sa dili pa ang giatngan nilang binukbukay, ang 36-anyos nga si Nietes nagkanayon nga wala siya’y gibati bisan og gamay nga presyur ug gani nagpanikad na siya gumikan kay dugay na man niya gihuwat kining awaya.
“Normal lang ang gibati ko karon. No pressure and excited na moduwa kay mao na man ni ang gihuwat nako,” matud pa ni Nietes.
Mahinungdanon ang ikaduhang pagtaak ni Nietes ibabaw sa ring didto sa Amerika gumikan kay mao man kini ang labing unang higayon nga moaway siya ubos sa HBO live telecast.
Dili gusto si Nietes nga usikan lamang ang maong talagsaon nga kahigayonan.
“Ihatag lang gyud nako ang pinaka-best perfomance nako nga modaog,” sumala pa ni Nietes nga nagtangag og
40-1-4 record uban ang 22KOs. Si Reveco nagtangag og 39-3 nga baraha uban ang 19KOs.
Si Nietes gikinahanglan gyud nga modaog gumikan kay mag-abli man kini sa iyang pultahan ngadto sa mas bililhong oportunidad.
Usa niini, si four-division world champion ug former pound-for-pound king Roman ‘Chocolatito’ Gonzalez sa Nicaragua mipadayag sa iyang tinguha nga makigharong ni Nietes alang sa bakanteng WBO super flyweight title.
Wa’y plano si Nietes nga moatras niini.
“Depende kun magkasinabot lang sa negotiation. Duwa ta bisa’g kinsa kay duwa gud ato gipangita,” batbat pa ni Nietes.
“And I’m happy for that kay gidawat na niya ang paghagit nako niya sa una pa. Dugay na bitaw na nako siya gihagit,” dugang pa ni Nietes.
Apan sa dili pa siya maghunahuna sa sangka nilang Gonzalez, kinahanglan una nga idispatsar ni Nietes si Reveco karong Domingo. (BANAT NEWS)
- Latest