Rookie hari sa hinansakay
CEBU, Philippines — Ang rookie sa Utah Jazz nga si Donovan Mitchell maoy nanghawod sa 2018 Verizon Slam Dunk contest nga kabahin sa 67th NBA All-Star weekend kagahapon didto sa Staples Center sa Los Angeles, California.
Si Mitchell nanginahanglan og dili mominus 47 puntos sa pinal niyang dunk sa championship round aron pildihon si Larry Nance Jr. sa Cleveland Cavaliers. Nakakuha siya og 48 hinungdan nga siya maoy gikoronahang kampiyon.
Si Mitchell nakakuha og 50 sa una niyang dunk sa final round human iyang gipabanda ang bola sa board dayong hansak niini nga maoy kinaham niyang buhaton.
Iyang gilupig si Nance sa final round, 98-96.
Gitadhana gyud si Mitchell nga modaog. Wala unta siya'y apil sa listahan sa mga entrante apan kalit nga gipaslak ang iyang pangan isip hulip ni 2016 Slam Dunk runner-up Aaron Gordon nga misibog kay dunay angol.
Samtang gipamatud-an ni Devin Booker sa Phoenix Suns nga siya maoy labing hait nga tirador sa liga human siya naghari sa 3-point shootout ug mitala pa og record alang sa labing daghan nga puntos sa maong kompetisyon.
Si Booker mikadlit og 28 puntos sa final round human nakapasud og 20 sa 30 niya ka itsa aron pildihon ang kanhi kampiyon nga si Klay Thompson nga mitali lamang og 25 puntos.
Ang defending champion nga si Eric Gordon wala maka-eskapo sa unang hugna pa lamang. (BANAT NEWS)
- Latest
