Beermen lumapit sa twice-to-beat
MANILA, Philippines — Mula sa mahimbing na pagkakatulog sa first half ay gumising ang nagdedepensang San Miguel para makalapit sa inaasam na ‘twice-to-beat’ incentive sa eight-team quarterfinals cast.
Bumangon ang Beermen buhat sa 15-point deficit sa second period para balikan ang Alaska Aces, 109-96 at kunin ang kanilang pang-pitong panalo sa 2018 PBA Philippine Cup sa Batangas City Sports Center.
Humakot si guard Chris Ross ng 26 points, 9 assists at 4 steals habang nagposte si four-time PBA MVP June Mar Fajardo ng 17 markers at 18 rebounds para sa three-time All-Filipino Cup champions.
Nakabawi ang San Miguel (7-2) mula sa kanilang 96-106 kabiguan sa Blackwater noong nakaraang Linggo habang nalasap ng Alaska (6-4) ang ikalawang sunod na kamalasan matapos sumakay sa isang six-game winning streak.
Matapos ilista ang 26-16 abante sa first period ay itinarak ng Aces ang 15-point lead, 46-31 mula sa basket ni Sonny Thoss sa 4:18 minuto ng second quarter.
Humataw naman si Ross ng 11 points sa third canto para tulungan ang Beermen na agawin ang 74-71 bentahe sa pagtatapos ng nasabing yugto.
Isang 10-3 atake ang inilunsad ng San Miguel, tampok dito ang dalawang sunod na three-point shots nina Yancy De Ocampo at Brian Heruelas, para iposte ang 11-point advantage, 84-73 sa 8:13 minuto ng fourth period.
Huling nakadikit ang Alaska sa 83-87 mula sa dalawang free throws ni JVee Casio sa 4:45 minuto ng laro hanggang magtuwang sina Fajardo, Matt Ganuelas-Rosser at Marcio Lassiter para muling ilayo ang Beermen sa 94-83 sa huling 3:11 ng labanan.
- Latest
