Krusyal nga duwa sa Magnolia, GlobalPort

CEBU, Philippines — Usa ka pisikal ug init nga duwa ang gipangandaman ni Magnolia Hotshots coach Chito Victolero sa ilang  sangka sa GlobalPort Batang Pier sa PBA Philippine Cup karong gabii didto sa Smart Araneta Coliseum.

Ang duwa gikatakda  sa alas 7 sa gabii human sa duwa tali sa Blackwater Elite ug Kia Picanto.

Matud ni Victolero,  nga krusyal ang duwa dili lang kanila kun di lakip na usab sa GlobalPort ug mao kini ang hinungdan nga buhaton sa players sa matag koponan ang tanan aron modaog.

Gusto modaog ang  Magnolia aron maseguro ang  top  two seed ug makabaton og ‘twice-to-beat’ advantage sa playoffs. 

Sa kasamtangan, ang Hotshots nakigsawo  sa Alaska Aces sa ikaduhang dapit sa standing sa ilang 6-3 win-loss records sunod sa defending champion San Miguel Beermen (6-2).

Sa ilang bahin, ang Fil-American  nga si Stanley Pringle sa GlobalPort nanganti nga mobihag na usab sila og laing lig-ong koponan aron makakuha og  luna sa playoffs.

Ang GlobalPort anaa sa ikapitong dapit sa standing uban ang  4-4 nga baraha ug nahayagan ilang tsansa sa playoffs human sa ilang  99-84 nga kadaogan batok sa TNT KaTropa  niadtong Miyerkules.