Party sa Celtics nalawgaw

CEBU, Philippines — Nagdasok ang mga dumadapig sa Boston  aron magselebrar uban ni Paul Pierce, apan gilawgaw ni LeBron James ug sa Cleveland ang makahuloganon nilang gabii human gilat-an sa Cavaliers ang Celtics, 121-99 sa NBA kagahapon didto sa Boston Garden sa Massachusetts.

Wala panumbalinga ni James ang nahiaguman niyang angol sa iyang paa sa unang kuwarter aron pagkadlit og 24 puntos, 10 ka assists ug walo ka rebounds alang sa ikaduha nilang impresibong daog sukad mipahigayon og usa ka dakong lahugay ang ilang koponan.

Ang Cleveland nakakuha og upat ka bag-ong players samtang gilabay niini ang unom apil na sila si Isaiah Thomas, Dwyane Wade, Derrick Rose, Jae Crowder ug Iman Shumpert sa tinguha nga mapahayagan ang ilang kampanya nga makataak sa NBA Finals sa ikaupat nga sunod-sunod nga higayon.

“We got some players that are pretty smart and they picked it up like they had been here all year,” matud pa ni James nga miduwa sud lamang sa 28 minutos.

Bisan pa man sa kaparotan sa Celtics, giangkon gihapon ni Pierce ug sa iyang pamilya ang gabii human pormal nga giretiro sa Boston ang iyang numero 34. 

Sa emosyonal nga seremonyas atol sa halftime, si Pierce nakadawat og pagdayeg gikan nila ni Kobe Bryant ug Magic Johnson.

“It definitely gave me chills, especially with LeBron out there. I wanted to be out there,” matud pa ni Pierce, kansang pangan gisyagit sa ilang fans human ang Celtics nalubong og 27 puntos sa katapusang sayes minutos sa duwa.

Sa labing una nilang duwa uban sa Cavs, si Jordan Clarkson miiskor og 17 puntos, si Rodney Hood miamot og 15 puntos, si George Hill mipupo og 12  puntos ug si Larry Nance miamot og singko puntos.

“All of our new guys performed and played well. So that’s a good sign,” dayeg pa ni Cavs coach Tyronn Lue sa iyang mga batos nga miposte sa ikatulo nilang sagunson nga daog.

Si Terry Rozier mihipos og 21 puntos ug siyam ka assists, samtang si Kyrie Irving mikamada og 18 puntos alang sa Celtics nga nasugamak sa ikatulong higayon sa katapusan nilang upat ka duwa.

Sa lain pang mga resulta, ang Toronto Raptors milubong sa Charlotte Hornets, 123-103, ang Atlanta Hawks nakaipsot sa Detroit Pistons, 118-115, ang Minnesota Timberwolves  mipukan sa Sacramento Kings, 111-106.

Midaog sab ang Oklahoma City Thunder batok sa Memphis Grizzlies, 110-92, gipilde sa Indiana Pacers ang New York Knicks, 121-113, ang Houston Rockets midaog sa Dallas Mavericks, 104-97 ug ang Utah Jazz mipukan sa Portland TrailBlazers sa iskor nga 115-96. (BANAT NEWS)