Ginto nilangoy ni Janda sa 100m butterfly event sa US meet

JACKSONVILLE, Florida — Nasungkit ni Philippine Swimming League (PSL) standout Master Charles Jan­da ang unang puwesto sa boys’ 9-year 100 butterfly sa 2018 Bolles School Sharks TYR February swimming competition na ginanap sa Cecil Aquatics Center.

Pinagharian ni Janda ang naturang event matapos ire­histro ang isang minuto at 19.63 segundo para iwanan si Christopher Jeong ng South Korea na nagtala ng bilis na 1:21.25.

Pumangatlo naman ang Bataan pride sa 50 backstroke kung saan nagtala siya ng 36.87 segundo laban kina topnotcher Ryan Sepulveda at second-placer Clay Magyar na may oras na 36.77 segundo at 36.85 se­gundo, ayon sa pagkakasunod.

Nagningning rin si Diliman Preparatory School tanker Paul Christian King Cusing matapos kumuha ng pilak sa boys’ 17-year 100 butterfly sa pamamagitan ng kaniyang 53.16 segundong naisumite.

“The kids perform well despite of the winter weather. They’re not used to competing in a cold weather but I am proud of them and it was a very good exposure for them. I salute them and congratulations to all of them,” wika ni PSL President Susan Papa.

Magtatangka rin sa medalya sina Francino Archer Cor­puz (boys’ 10-under), at Paula Carmela Cusing (girls’ 14-year), Joaquin Federico Mirasol (boys’ 11-year), Raindale Ching (boys’ 13-year) Sophia Anne Barcelo (girls’ 12-year), Sofia Mae Ching (girls’ 10-under) at Jazmine Francheska Mirasol (girls’ 19-year).

“Next time we will bring more swimmers. Some of the PSL swimmers are in National Capital Region Palarong Pambansa qualifying tournament,” dagdag ni Papa.

Hahataw pa si Corpuz sa 50 breaststroke, samanta­lang masisilayan naman si Paula Carmela sa 100 backstroke, 100 Individual Medley at 50 butterly sa event na nilahukan ng mahigit 600 tankers mula sa malalakas na koponan sa Amerika at China.

Mapapalaban ngayong araw si University of the Phil­ippines’ bet Trisha Anne Oliveros sa girls’ 15-over 100m freestyle at 50m freestyle.