10TH-round ko win para kay Jerwin
MANILA, Philippines — Gusto ni Filipino boxing sensation Jerwin Ancajas na mapahanga ang mga boxing fans sa una niyang laban sa United States.
At higit pa ang kanyang ginawa.
Umiskor si Ancajas ng isang tenth-round knockout victory laban kay Mexican challenger Israel Gonzalez para sa kanyang ikaapat na sunod na pagtatanggol sa hawak na International Boxing Federation super flyweight crown sa US debut niya kahapon sa American Bank Center sa Corpus Christi, Texas.
Inihalintulad ng tubong Panabo City, Davao del Norte ang kanyang sarili sa mas mga tanyag na sina WBA champion Khalid Yafai, WBC king Srisaket Sor Rungvaisai at WBO title-holder Naoya Inoue.
“Highest level na rin po ang kalidad nila,” sabi ng 25-anyos na si Ancajas. “Kino-consider ko na mas mababa na champion ako sa kanila pero pinagsisikapan ko na mapantayan sila.”
Pinaganda ni Ancajas ang kanyang win-loss-draw record sa 29-1-1 kasama ang 20 KOs kasabay ng pagpigil sa eight-fight winning streak ng 21-anyos na si Gonzalez (21-2-0, 8 KOs).
Nauna nang tinalo ni Ancajas sa kanyang title defense sina Jose Alfredo Rodriguez ng Mexico (TKO 7th round sa Macau), Teiru Kinoshita ng Japan (TKO 7th round sa Brisbane, Australia) at Jamie Conlan (TKO 6th round sa Belfast, Ireland).
Unang napabagsak ni Ancajas si Gonzalez sa first round bago pinadapo ang matulis na straight left hand na nagpatumba sa Mexican sa huling 1:34 minuto ng 10th round.
Nang makatayo si Gonzalez ay kaagad siyang nirapido ni Ancajas at muling napatumba ang challenger mula sa mas mabigat na straight left.
Tuluyan nang itinigil ni referee Rafael Ramos ang laban sa huling 1:50 minuto ng tenth round.
Nauna nang ikinunsidera ni Bob Arum ng Top Rank Promotions si Ancajas bilang susunod sa mga yapak ni Filipino world eight-division champion Manny Pacquiao.
“Hindi ko talaga naiisip na ikinukumpara ako kay Sir Manny, pero sinisipagan ko sa laban para kahit kaunti man lang maging katulad ni Sir Manny,” sabi ng tubong Panabo City, Davao del Norte na hindi pa natatalo simula noong Marso ng 2012.
- Latest