PBA referees, officials sinuspinde

MANILA, Philippines — Maaaring nakakatawa ang nangyari sa huling 4.5 segundo ng fourth quarter sa 100-96 panalo ng Ba­rangay Ginebra laban sa nag­dedepensang San Mi­guel sa 2018 PBA Philippine Cup noong Linggo.

Ngunit hindi ito ikinatuwa ni PBA Commissioner Willie Marcial.

Hindi lamang player ang pinagbayad at sinus­pinde ni Marcial kundi ma­ging ang apat na referees at dalawang table officials sa naturang laro ng Gin Kings at Beermen.

Pinatawan ni Marcial ng three-week suspension si referee Jerry Borja na tu­mawag ng foul kay Sol Mer­cado ng Gin Kings la­­ban kay Chico Lanete ng Beermen sa huling 4.5 se­gundo sa fourth quarter.

Ngunit imbes na si La­nete ang tumira ng foul shot, ang kanyang kakamping si Chris Ross, naglista ng 5-of-5 shooting sa charity line, ang pumukol ng free throw.

Ito naman ay pinayagan nina re­ferees Noy Guevarra, Jimmy Mariano at Mardy Mon­toya.

Sina Guevarra (free throw administrator), Ma­riano (crew chief) at Monto­ya (fourth man) ay pinata­wan ng one-week suspension dahil sa nangyari.

Sinuspinde rin ng isang linggo si veteran book scorer Lito Mendegoria at barker Noel Zarate na hindi ipinagbigay-alam sa mga referees ang nasabing pagkakamali.

Pinagbayad si Ross ng P25,800.