Warriors nagbangis
CEBU, Philippines — Si Kevin Durant mi-iskor og 25 ug si Stephen Curry midugang og 22 puntos ug 11 ka assists alang sa Golden State Warriors nga milusad og eksplosibong opensa sa ikatulong kuwarter aron pagpayaka sa Denver Nuggets, 127-108, sa NBA kagahapong adlawa didto sa Pepsi Center sa Denver, Colorado.
Wala sab magpa-alkansi sila si Klay Thompson ug Draymond Green nga mitikdol og 15 puntos matag usa alang sa Warriors, nga midaog kaunom sa katapusan nilang pito ka duwa apil na ang tulo ka sagunson nilang misyon sa balwarti sa ilang kontra.
"Getting on the road was good for us,” matud pa ni Warriors coach Steve Kerr. “Sometimes you need to get on the road to feel more threatened. A team like this especially that’s used to being successful. I thought we took a couple of home games for granted and we weren’t defending, we weren’t bring energy.”
Si Will Barton mitali og 21 puntos apan wala'y bisan usa sa lima ka starters sa Nuggets ang nakamugna og puntos nga double figures.
Labaw lamang og lima sa halftime, ang Warriors mipabuto og 24-4 nga bomba pagsugod sa second half aron pagbuak sa duwa uban ang 84-59 nga labaw. Nakapabarag kini sa Nuggets sa nahibiling bahin sa duwa.
Sa kinatibuk-an, ang Warriors migaling og 43 puntos sa ikatulong kuwarter nga maoy nahimo nilang taytayan pag-abante og 26 puntos, 103-76, padung ngadto sa katapusang 12 minutos sa aksiyon.
“I think everybody came out with great energy in the second half. We found something in the pick and roll and we tried to exploit it,” dason pa ni Durant.“Guys were moving on the backside without the ball, finding the open area and knocking down shots.
Sa maong pagratsada sa Warriors, sila si Durant ug Curry nagkumboya og 25 puntos.
“We didn’t play well a few games early on, but the last three games have been solid for us.We’ll try to take it home and build on that,” dugang pa ni Durant.
Ang Nuggets alkansi og 13 puntos human sa unang kuwarter apan milusad kini og nagbagang 15-0 run aron pagtilaw og 38-36 nga labaw. Wala hinoon kini magdugay gumikan kay mi-rally sab dayon ang Warriors aron pagkontrolar og balik sa duwa, 60-55. — (BANAT NEWS)
- Latest
