Wheelchair Basketball Canada magdaraos ng clinic sa Pinas

MANILA, Philippines - Sa tulong ng Embassy ng Canada, nandito sa Pilipinas ang Paralympics gold medalist na Wheelchair Basketball Canada para magdaos ng tatlong araw na players-coaches clinic para sa Philippine national wheelchair basketball team simula kahapon hanggang sa Abril 22 sa Rizal Memorial Coliseum.

Tiniyak naman ni head coach Vernon Perea at assistant coach Harry Solanoy ng national team na marami silang matutunan sa tatlong araw na players at coaching clinics na sinusuportahan din ng Philippine Paralympics Committee at Philippine Basketball Association.

Pangungunahan ni Mike Frogley ang head coach ng Canadian team na nag-champion sa Paralympics noong 2000 at 2004 ang WBC. Kasama ni Frogley sina David Eng, ang flag bearer ng Canada sa Rio Paralympics noong nakaraang taon at Bo Hedges at ang Fil-Canadian na si Jason Conrad Naval.

“We can learn many things here. And it’s important for our campaign in the ASEAN Paralympics ngayong Disyembre,” sabi ni Perea sa press launching kahapon sa Rizal Memorial Coliseum na dinaluhan din ni Canadian Ambassador to the Philippines John Holmes at PPC president Mike Barredo.

Ayon kay Holmes ang naturang event ay kabilang sa ika-150 anniversary of Confederation ng Canada. Pagkatapos ng Pilipinas tutuloy ang WBC sa Cambodia para naman sa tatlong araw na players-coaching clinics.

Kabilang sa nasabing clinics ang pagdaraos ng celebrity skills demonstration at fun exhibition games ng whellchair basketball team pagkatapos ng laro ng Alaska Aces at Phoenix Fuel Masters sa Philippine Basketball Association Commissioner’s Cup ngayong Biyernes sa Smart Araneta Coliseum.

Humihingi rin si Barredo ng tulong mula sa Philippine Sports Commission at sa private sector para sa mga miyembro ng national team na sasabak sa ASEAN Paralympic  Games sa Kuala Lumpur, Malaysia ngayong Disyembre.