Thomas miduwa bisan nagbangutan
CEBU, Philippines - Nagbangutan man tuod, apan wala igsapayan ni Isaiah Thomas nga moduwa sa tinguha nga agakon ang Boston Celtics sa una nilang sangka sa NBA playoffs batok sa Chicago Bulls kagahapon.
Emosyonal kaayo si Thomas sa iyang pagtunob didto sa TD Garden tungod kay usa pa man lamang ka adlaw ang milabay sukad namatay ang manghod niyang babaye nga si Chyna gumikan sa aksidente sa sakyanan.Gani dunay pipila ka mga mensahe nga nakasulat sa iyang sapatos nga nag-ingon: “Chyna”, ”RIP Lil Sis” ug “I love you”.
Mipabuhagay man tuod siya og 33 puntos, unom ka assists ug lima ka rebounds, apan daw sa nasamotan hinuon ang kaguol ni Thomas human sila gipilde sa Chicago Bulls, 106-102 sa Game-1 sa ilang best-of-seven series. Bisan pa man niini, gipauwanan gihapon si Thomas og tumang pagmahal ug ingon man solidong suporta dili lamang sa iyang team, apan hasta sab sa ilang fans nga mihatag kaniya og mainitong abiba sa dihang gianunsiyo ang iyang pangan sa wala pa masugdi ang duwa. Migahin sab og oras sa kahilom ang Celtics agi’g pahinungod sa kalag sa mitaliwan niyang igsuon.
Ang teammate niyang si Avery Bradley usa sa mga mipadayag og pagdayeg sa gipakitang kalig-on ni Thomas taliwala ning subo kaayo nga hitabo nga nadangat sa ilang pamilya. Gawas sa iyang mga kauban, mipadangat sab sa ilang pahasubo ngadto sa pamilya ni Thomas si NBA Commissioner Adam Silver ug ang pipila ka mga bitoon sa liga. (BANAT NEWS)
- Latest