Baby Tams iuuwi na ang korona
MANILA, Philippines - Sisikapin ng Far Eastern University-Diliman na kubrahin ang kampeonato sa pakikipagtipan nito sa National University sa Game 2 ng UAAP Season 79 juniors basketball best-of-three finals ngayong hapon sa The Arena sa San Juan City.
Magpapang-abot ang Baby Tamaraws at Bullpups sa alas-2 ng hapon.
Kinapitan ng Baby Tamaraws ang 1-0 kalamangan sa serye matapos itakas ang pahirapang 66-65 panalo laban sa Bullpups sa Game 1 noong Martes.
Ngunit aminado si Baby Tamaraws coach Allan Albano na muling daraan sa matinding pagsubok ang kanyang tropa bago makuha ang korona.
“Nawalan kami ng killer instinct kaya ang baba ng score namin, nine points lang sa fourth quarter. Yung fluidity ng offense, nawala,” ani Albano.
Hindi rin madali para sa Baby Tamaraws na depensahan si Bullpups ace John Lloyd Clemente na kumana ng 25 puntos sa Game 1.
Kinakailangan din ng FEU-Diliman ng solidong depensa kina NU frontliners Rhayyan Amsali at Karl Peñano sa shaded lane.
Kaya naman sasandal ang Baby Tamaraws kina LJ Gonzales, Kenji Roman, Xyrus Torres at Jack Gloria upang maduplika ng kanilang bataan ang series opener win laban sa Bullpups.
Maganda ang inilaro ni Gonzales na may double-double na 10 rebounds at 10 assists sa Game 1. (CCo)
- Latest
