Gisungay sa Bulls
Ang Bulls mipasud sa tanan nilang 22 ka free throws, apil na niini ang duha gikan ni Jimmy Butler sa nahabilin nga siyam ka segundos nga maoy nag-aswat sa Bulls ngadto sa kadaugan.
Si Butler maoy nangu sa Bulls uban sa iyang 29 puntos ug pito ka assists. Nagtangag na sila karon og 28-29 win-loss record.
Ang Celtics nga nadakin-as ngadto sa 37-20, gipangulohan ni Isaiah Thomas uban sa iyang 29 puntos. Si Thomas miiskor og dili momenos sa 20 puntos sa ika-41 ka sagunson nga duwa aron pagbuak sa ilang franchise record nga kanhi gihuptan ni Hall of Famer John Havlicek.
Sa laing duwa, ang Washington Wizards nga maoy usa sa labing init nga team karon sa NBA, mipabuhagay na og nagbagang opensa dayon na ngadto sa pagpatikangkang sa nagkagidlay nga Indiana Pacers, 111-98, kagahapon didto sa Verizon Center sa Washington DC.
Si Otto Porter Jr. dunay 25 puntos ug walo ka rebounds, si Markieff Morris mitali og 21 puntos ug 12 ka assists, samtang si Bradley Beal mihipos og 19 puntos sa Wizards nga maoy midominar gikan sa pagsugod sa duwa.
“We have a lot of threats and it’s hard to key on any one guy,” matud pa ni Beal. “We are enjoying this. Winning like this is fun. We are playing with a lot of energy and we don't care who is scoring or anything like that. We enjoy playing for each other."
Ang Wizards nagbitbit na karon og 34-21 record, samtang gipatilaw ang Pacers sa ikaunom niining sunod-sunod nga kapildihan.
Sila si Myles Turner ug Paul George dunay 17 puntos matag usa sa Pacers, kansang baraha misukarap ngadto sa 29-28. (BANAT NEWS)
- Latest
