Ancajas pabiling IBF champ
CEBU, Philippines - Ang Pinoy’ng boksidor nga si Jerwin ‘Pretty Boy’ Ancajas mipatugpa og solidong mga kumo aron pagpasurender sa Mehikanong challenger nga si Jose Alfredo Rodriguez human sa pito ka hugna hinungdan sa malampuson niining pagdepensa sa iyang trono isip IBF junior bantamweight champion niadtong Domingo sa gabii didto sa Cotai Arena sa Venetian Resort Macau.
Human gikulata og maayo ang iyang kontra nga klarong nagkalipong-lipong na, wala na magtuga-tuga pa si Rodriguez nga mopadayon og away aron paglikay sa iyang kaugalingon sa dugang kadaut.
“Una, nagpapa-salamat po ako ng malaki sa ating Panginoong Diyos at sa mga sumusuporta po sa akin lalo na sa aking pamilya at sa team ko,” matud pa sa 25-anyos nga si Ancajas segun sa taho ni Lito de los Reyes sa Philboxing.com.
Gikataho nga naangol ang tuong abaga ni Rodriguez gumikan sa mahait nga mga birada ni Ancajas.
“Nakuha agad ni Jerwin si Rodriguez sa second round pa lang,” matud pa sa manedyer ug trainer ni Ancajas nga si Joven Jimenez.
Si Ancajas, nga lumad gikan sa Panabo City, Davao del Norte, nagbitbit na karon og 26-1-1 record uban ang 17KOs, samtang si Rodriguez natagak ngadto sa 32-5 uban ang 19KOs.
Mao kadto ang labing unang pagdepensa ni Ancajas sa titulo nga iyang nasakmit human pildiha ang Puerto Rican nga si McJoe Arroyo niadtong Septiyembre sa miaging tuig didto sa Taguig. (BANAT NEWS)
- Latest
