Mayweather bukas na makigsangka ni McGregor

CEBU, Philippines - Nausab ang tonada ni undefeated boxing star Floyd Mayweather human siya miingon nga adunay posibilidad nga mahitabo ang ilang super-fight ni mixed martial arts champion Conor McGregor kun iduso gyud kini sa mga fans.

Si Mayweather kinsa misaksi sa usa ka boxing match didto sa Las Vegas, nakorner sa mga media diin siya subling gipangutana kabahin sa dugay nang gidungog nga sangka nila sa Irish fighter. "It can happen. It would be something that I will give the fans if they want to see," pamahayag pa ni Mayweather sa Associated Press.

Hinuon ang retired boxer niingon nga mohaw-as ra siya sa retirement ug atubangon si McGregor sa usa ka boxing match kun magkasinabot sila sa detalye sa himuong sangka.

Usa sa giduso ni Mayweather mao ang timbang unya nga ilang sangkaan nga mao ang 147 o 150 lbs.  Ang two-division UFC champ nga si McGregor maoy kampiyon sa 155 lbs. division sa MMA. (BANAT NEWS)