Batang Pier abante sa playoffs

CEBU, Philippines - Nahupay na ang kabalaka sa mga fans sa GlobalPort Batang Pier human hingpit nang miabante sa quarterfinals ang koponan dihang ilang gibuntog ang Rain or Shine Elasto Painters,115-99,  sa katapusang duwa nila sa elimination round sa PBA Philippine Cup didto sa Cuneta Astrodome.

Ang GlobalPort misaka sa 6-5 nga baraha nga mibutang kanila sa kasamtangang ikaupat nga dapit. Daku kining kalambuan sa Batang Pier human usab sila mapakyas pagsud sa playoffs sa All-Filipino Cup sa miaging season.

Pulos gikan sa duha ka sunod-sunod nga pilde, ang GlobalPort ug Rain or Shine init nga nagpinaksitay sa first half nga miresulta sa 50-all nga tabla.

Apan pag-abot sa third period, mikadlit og kalit sa ilang scoring sila si Stanley Pringle, Terrence Romeo ug JR Quinahan aron pangulohan ang bangis nga rally sa Batang Pier nga miresulta sa 71-60 nga labaw sa 3:35 sa third period.

Gikan didto wala na nila lingia pa ang Painters og giinat sa Batang Pier ilang labaw, 100-83, sa katapusang 2:59 sa duwa.

Si Romeo mipatik og 44 puntos, samtang iyang katimbang nga si Pringle mitira og 28 puntos alang sa GlobalPort. (BANAT NEWS)