Rose misteryosong wala miduwa sa Knicks
CEBU, Philippines - Nahimong usa ka tanghaga sa NBA ang point guard sa New York nga si Derrick Rose gumikan sa mistersoyo niining wala pagpakita sa ilang duwa nga miresulta ngadto sa 110-96 nga kaparotan sa Knicks batok sa New Orleans Pelicans kagahapon.
Kay wala si Rose, ang Knicks napugos pagbutang ni Brandon Jennings sa ilang starting line-up. Igo lamang mipahibawo ang New York sa ilang fans nga wala uban kanila si Rose.
Atol sa iyang pre-game press conference, si coach Jeff Hornacek wala mohatag og indikasyon nga absent ang usa sa mga sinaligan niyang players. Human sa duwa, misuway siya og lihay sa mga pangutana kabahin ni Rose ug bugtong niyang gisulti mao nga wala sila’y igong impormasyon aron hisgutan ang maong matang.
“Right now we don’t have enough information to really give you anything,” matud pa ni Hornacek agi’g pagsanta sa gihimong pagsukit-sukit kaniya sa mga tigbalita kabahin ni Rose.
Wala sab motubag si Hornacek sa mga balita nga pakyas sila pagkontak ni Rose. Giawhag hinuon niya ang tanan nga respetuon ug sabton kun unsa man gani ang gihambin karon ni Rose.
Ang 28-anyos nga si Rose, ang 2011 NBA Most Valuable Player sa dihang nagduwa pa kini uban sa Chicago Bulls, epektibo sa labing una niyang season sa Knicks diin siya mi-average og 17.3 puntos sa 33 ka duwa.
Sa iyang wala pagduwa, ang Knicks nahisukamod sa ikawalong higayon sa katapusan nilang siyam ka duwa. (BANAT NEWS)
- Latest
