Belo misalida dayon sa Blackwater elite

CEBU, Philippines - Ang rookie forward  nga si Mac Belo mipakita sa iyang kaandam nga molabok sa propesyonal nga liga human iyang gigiyahan ang Blackwater Elite ngadto sa franchise-best 2-0 start sa bag-o lang nasugdan nga PBA Philippine Cup.

Miduwa nga daw usa ka mangtas nga beterano, ang 6-foot-4 nga si Belo mipatik og average nga 21 puntos, 7.5 rebounds ug 1.5 steals sa duha ka sagunson nga daog sa Blackwater batok sa Phoenix Fuel Masters ug 2016  Governors’ Cup runner-up Meralco Bolts.

Ang maanindot niyang salida maoy nagtuboy kaniya pagdaog sa labing una niyang Accel-PBA Press Corps Player of the Week award ning pasiunang dalit sa ika-42 nga season sa Philippine Basketball Association.

Ang kanhi batos sa Far Eastern University Tamaraws mipilde nilang three-time MVP June Mar Fajardo ug Alex Cabagnot sa San Miguel Beer, Terrence Romeo sa GlobalPort, Ranidel de Ocampo sa TNT Katropa ug Bradwyn Guinto ug Sean Anthony sa NLEX alang sa maong pasidungog.

Sa iyang debut sa liga, si Belo mipahibalo dayon sa iyang presensiya human miratsada og 17 puntos ug siyam ka rebounds sa ilang 94-87 nga kadaugan sa Phoenix.

Ang garbo sa Midsayap, Cotabato nakasustinir sa iyang kainit ug mihimo og 25 puntos,  unom ka rebounds, tulo ka steals ug duha ka blocks sa kulbahinam nilang 86-84 nga daog batok sa Bolts. (BANAT NEWS)