E-F Surplus nakabuling record sa pagutlan

CEBU, Philippines - Namunga gyud ang mga paningkamot sa E-F Surplus ug ila nga gipilde ang labing lig-ong team nga Pagutlan, 74-72 sa J&J Surplus 6th Conference basketball tournament niadtong Sabado didto sa  Talit’s Garden open court sa  Tayud, Lilo-an.

Gawas nga ilang naputol ang nagkadinang daog, ang E-F Surplus mao sab ang  unang team nga nakabuling sa rekord sa Pagutlan, 8-1.

Labaw ang Pagutlan og siyete puntos sa kapin dos minutos ang nahabilin sa fourth quarter, apan ang E-J Surplus mihimo og back-to-back 3 pointers kortesiya nilang Fury Trazona ug Tata Betinol aron makan-an ang labaw nga nakapakulba sa duwa. Misamot pa kakulbahinam ang duwa dihang nagtabla ang iskor, 72-all sa nahabiling 24 segundos. Nilabaw og balik ang E-F Surplus  74-72 sa tip-in ni Anton Trangia sa nahabiling otso segundos.

Maka-overtime pa unta ang Pagutlan, apan  wa’y suwerte kay mikagar ang ilang duha ka mga tira.

Sila si Trangia ug Betinol maoy  topscorers sa E-F Surplus  nga miantog og 17 puntos. Wala  kaarte si Fury Trazona kay guwardiyado kini, apan nakahimo siya og pag-iskor og 11 puntos alang sa ilang 10-1 nga baraha.

Ang Pagutlan gipangulohan ni Marmar Uzarraga sa iyang 24 puntos.

Ligas sab kaayo ang duwa sa Narasaki diin midaog lang kini og uno punto batok sa J-J Surplus, 76-75.

Midaog sab ang Galvasteel pinaagi sa pagdemolis sa Villa Rina Subdivision, 64-45.

Ubos sa bendisyon sa ilang presidente nga si Henry Agbon, kinsa mao sab ang tag-iya sa J&J Surplus ang liga gipadagan ni commissioner Fury Trazona sa abag nilang Chang Tejero, Joper Inahid ug Choy Pilapil.

Puntos matag usa

Unang duwa:

E-F SURPLUS (74) –  Trangia 17, Betinol 17,  Fury 11, Palo 8, A. Sabang 8, Layese 5, C. Sabang 2, Caballes 2, Nuñez 2, A. Pepito 2.

PAGUTLAN (72) – Uzarraga 24, Judilla 11, Seno 10, Cantillas 8, Alcuizar 7, Ruiz 2, Aton 2, Pagobo 2, Brigoli 2, Gasal 2, Bontol 2.

Ikaduhang duwa:

GALVASTEEL (64) –  Tiongzon 14, Gestopa 13, Boyles 8, Gellocane 7, Flores 5, Mantos 5, Ravanna 4, Capin 4, Judaya 2, J. Orongan 2.

VILLA RINA (45) –  Radoc 10, De Arca 7, Enoc 6, Arnado 5, Cahanap 4, Yurag  4,  Dumon  2,  Onate 2, Gens 2,  Arnado  2, Pepito 1.

Ikatulong duwa:

NARASAKI (76) – Momo 24, Alinsug 13, Oroyan 10, B. Echivere 6, Astellero  6, Tadlas 4, H. Agbon 4, Junreon 2, Patiluna 2, Genteroliso 2.

J/J SURPLUS (75) – Gungob 19, Tampus 18, Javier 17, Ybañez 8, Pestaño 8, Mantuhac 6. (BANAT NEWS)