Bulls misungay sa Nets
CEBU, Philippines - Ang Chicago Bulls milusad og nagbagang opensiba gikan sa sinugdanan aron paglubong sa Brooklyn Nets, 118-88 alang sa ikatulo nilang sunod-sunod nga daog nga maoy labing nindot nilang sinugdanan sa NBA sukad niadtong 1996-1997 season diin sila gipangulohan pa ni Michael Jordan.
Timaan sa bangis nilang ataki, pito ka players ang nakaiskor og double digits sa Bulls sa pagpangu ni Jimmy Butler nga midaro og 22 puntos.
Si Nikola Mirotic mikolekta og 16 puntos ug 10 ka rebounds, samtang si Isaiah Cannan midugang og 15. Ang reserve duo milansang og pito sa 11 ka 3-pointers alang sa Chicago.
Si Taj Gibson mitali og 14 puntos ug 11 ka rebounds, samtang si Dwyane Wade mikadlit og 12 sa una niyang road game uban sa Bulls. Si Doug McDermott duna sa’y 12 puntos sa Bulls, samtang si Rajon Rondo midugang og 10.
Sama sa Bulls, ang Los Angeles Clippers ug Atlanta Hawks nagpabilin sab nga wa’y pilde sa tulo nila ka mga duwa.
Si Chris Paul miburak og 18 sa iyang 24 puntos sa second half aron pagtuboy sa Clippers ngadto sa 116-98 nga demolisyon sa Phoenix Suns.
Duna sa’y walo ka assists ug lima ka rebounds si Paul, samtang si Blake Griffin miratsada og 21 puntos, 11 ka rebounds ug lima ka assists. Wala sab magpabitin si DeAndre Jordan nga mirehistro og 19 puntos ug 11 ka rebounds sa Clippers.
Samtang ang Hawks nakasustinir sa ilang kainit aron pagposte og 106-95 nga daog batok sa Sacramento Kings.
Sila si Paul Millsap ug Dwight Howard mikulit og solidong double-double sa Hawks nga nanglimbasog una sa ikaupat nga kuwarter aron pagpiog sa Kings.
Si Millsap dunay 13 puntos ug 14 ka rebounds, samtang sa Howard mikadlit og 18 puntos ug 11 ka rebounds sa pisikal kaayong duwa nga miresulta ngadto sa 54 ka fouls.
- Latest